Cristais de Meraki

Desde o histrionismo até a calma, os memes sobre a presidenta cuqui, os discursos sobre xestión ou os spots electorais que te removen por dentro. Todo é política e en todo hai comunicación. Para afondar sobre todo isto, e o papel que xoga a muller no medio deste caos, Carmen del Río achégase a falar con nós para demostrar que á mocidade tamén lle interesa. Cofundadora da axencia de comunicación política Xacias e do podcast Carretando, non podía haber mellor forma de abrir os cristais desta tempada ;)

Para comezar diremos que é o final, o primeiro capítulo da moi probablemente última tempada. Non nos gusta despedirnos, e por iso nos adiantamos aos acontecementos para falar sobre o adeus, o peche de etapas, a fin das relacións ou a morte. Mentres, aprendemos a procesar todas as cousas que pasan polo medio, a despedirnos de nós mesmas e a buscar novos horizontes aos que saudar

No último capítulo do ano Bea Caneda, unhas das creadoras da revista dixital ACOUSA, acompáñanos nun capítulo especial (e extra longo) para falar sobre o mundo da investigación, o emprendemento, a importancia dos proxectos persoais, o camiño docente e outras moitas cousas todas arrodeadas do ambiente máis navideño, onde as anécdotas son o prato principal e nós vimos a servir.

Soan os primeiros acordes e iso significa que comeza a despedida desta tempada. Curtiña, pero intensa. Para celebralo, Antía Ameixeiras e Sabela Caamaño achéganse até a Facom para falar con nós sobre erotismo, ritos, tradición e música popular. Coa súa voz, violín e acordeón, manteñen viva a historia e recuperan a identidade.

No capítulo de hoxe, compartimos entre nós e para vós un anaco de todo ese patrimonio inmaterial que xa vivirá para sempre na música de Caamaño e Ameixeiras.

Desde a dependencia emocional das amizades até a dureza das despedidas. Ninguén nos ensina a ser bos amigos, marcar os nosos límites ou que, ás veces, esa familia escollida tamén nos pode facer dano. No capítulo de hoxe tiramos de vulnerabilidade para falar sobre como facelo mellor e querernos primeiro.

De que vai a teoría da amizade? Como se superan as envexas? Que pasa cando te sentes soa no teu grupo de amigos? Todo isto e moito máis nun episodio para vernos nun espello e reconciliarnos con todas as cousas das que nos asusta falar.

Neste novo Cristal Lucía Estévez fainos un oquiño na súa apertada axenda como cineasta de éxito para vir falar sobre os egos no audiovisual, a posibilidade de conxugar a intensidade coa risa, os bloqueos creativos e a importancia de rodearse dun bo equipo de traballo.

Directora de videoclips, curtas e webseries agora atópase no proceso de creación da súa primeira longametraxe. Gañadora dun Mestre Mateo e, aínda así, as inseguridades non acaban de irse. Por iso, nesta tempada na que se multiplican as entrevistas, perseguimos a resposta da seguinte pregunta: Que é o éxito?

Nesta nova tempada as Cristais de Meraki intentamos abirnos paso no devastador mundo do tiktoks, mais como estamos seguras de que hai moita xente da que aínda temos moito que aprender, acudimos aos reforzos e achegamos até o estudo da Facom a Sara Seco.

Graduada en políticas, xestora de proxectos na mesa pola normalización lingüística, creadora de contido e a túa tiktoker favorita d confianza; non hai nada que se lle escape e hoxe vén falar con nós sobre os prexuízos no mundo do life estyle, o odio nas redes, como manter os pés na terra e o mundo do famoseo. Se foramos vós non nolo perderiamos. Avisados quedades ;)

Volvemos coa terceira tempada de Cristais de Meraki e a síndrome da impostora ataca de novo. Despois de dous meses xogando a ser xornalistas vertemos neste Meraki todos os nosos medos e inseguridades. Semella que se hai un factor común entre todas as mulleres novas que facemos cousas é non sentirnos suficientes.

A autoesixencia como forma de vida porque, no fondo, non nos sentimos esas tías chulas que aparentamos ser. Aínda así, seguímolo intentando. Un meraki reflexivo para empezar a semana procurando coñecernos e recoñecernos en todos os nosos logros. Vémonos nos triunfos coas amigas que nos axudan a crer en nós mesmas

E colorín colorado... esta tempada está rematando. Resulta que esta semana foi o último día lectivo nas escolas e institutos de Galicia. E, tendo en conta que hoxe estamos ante o último capítulo do podcast antes das vacacións de verán, había que facer algo especial; como esas festas de fin de curso que lembras de maior ou as caixas de bombóns que traen xs profesorxs ao acabar o ano.

Por todo isto, hoxe, por moi Meraki que sexa, non vimos soas; senón que nos acompaña parte do alumnado do IES Pontepedriña que, xunto coa súa profe Bea, veñen a poñerse intensos con nós e a buscar en Cristais de Meraki un altofalante para as inquedanzas de toda unha xeración que non sempre se sinte escoitada.

A presión académica, as inseguridades, o medo a non ter grupo ou as expectativas de futuro... Inquedanzas universais que serven para pechar unha tempada na que nos abrimos en canle para crear un espazo seguro para nós e todas as que veñan. Remata así este Cristais de Meraki, deixando un oco para as novas voces con moitas cousas que contar.

Benvidos, benvidas e benvides ao último cristal da tempada. Coma sempre, mestúranse unha serie de emocións importantes porque a ninguén lle gusta despedirse. Pero claro, tendo en conta quen nos acompaña, todos os males se pasan.

Efectivamente, hoxe vén ata a facom para rememorar os seus anos universitarios e os inicios da súa carreira laboral Esther Estévez, xornalista e unha das caras máis visibles das redes da TVG. Mais, sobre todas as cousas, unha persoa que conta coa súa propia páxina de wikipedia!

Así, falamos sobre a vocación, as redes sociais, a lingua, traspasar fronteiras e os bailes do tiktok. Todo isto moi ben acompañadas da gañadora de non un, senón dous Mestres Mateos (aínda que ás veces lle custe crelo). Non volo podedes perder. Dicímoscho nós!

Ás veces falamos de cousas das que semella que non temos moita idea, pero parte do amor propio é aprender tamén a aceptar os nosos faios e aprender a querernos con eles. Por iso, intentando afondar nos picos e nos baixos que implica o proceso de descubrir como querernos a nós mesmas, pasamos este novo Meraki falando das cousas que nos custa aceptar neste proceso, de todas as que aínda nos quedan por aprender e de todas aquelas que si facemos ben. Porque o amor propio é unha movida, porque é difícil, cíclico e pouco definitivo. O amor propio non é cambiar o pelo, pero é tantas outras cousas que ás veces é o único sitio polo que sabemos comezar. Benvides á nosa aproximación máis honesta ao xeito no que intentamos querernos

Un domingo máis volvemos cun novo Meraki para falar sobre os soños, os de durmir e os outros.

Dende que somos cativas aprendemos a soprar os dentes de león, tocarnos o nariz cando dan as 11.11, recoller trebos de boa sorte e apagar candeas pensando naquilo que máis queremos. Hoxe vimos a compartir con vós todo o que ronda pola nosa cabeza cada vez que vemos unha estrela fugaz. Sempre coa esperanza de que iso de que os soños se se din en voz alta non se cumpren sexa un falso mito.

Así, abrimos o noso corazón e subconsciente para falar das cousas coas que soñabamos de pequenas (ou agora), da romantización dos soños, de como inflúe a nosa contorna nas cousas ás que aspiramos ou de como facer para "perseguir os teus sonos". Así que, xa sabedes, coidado co que desexades e non deixedes nunca de soprar dentes de león porque de soños tamén se pode vivir.

Oli! Comeza a Semana Santa e agardamos que estas vacacións vos permitan poñervos ao día con todos os capítulos das vosas podcasters favoritas (aka, nós). Por iso, hoxe traémosvos contidos fresco, saíndo un domingo máis á palestra para falar con Laura Rodríguez, a nosa xornalista-deportista favorita. Un pouco fartas de que ao falar de fútbol e mulleres só pensemos nas "mulleres de...", hoxe acompáñanos a nosa referente do fútbol local e feminino, para poder reconciliarnos con todas esas nenas ás que no recreo só lles deixaban pisar a portería. Se queredes saber máis sobre a nosa relación co deporte, a discriminación da muller no fútbol, o auxe dos medios de comunicación especializados en deporte feminino ou a necesidade de regar as flores que plantas, este é o voso capítulo.

Este domingo facemos unha viaxe no tempo para volver á nosa adolescencia. Unha época complexa, intensa, difícil, apaixonante, de aprendizaxe, de crecemento, de soidade, de ser malas persoas, de ser boas persoas... de existir. Compartimos unha das nosas charlas filosóficas para recoñecernos mutuamente e ser máis honestas, con nós e cos demais. O Meraki da adolescencia dá o punto de saída a unha nova quenda de charlas sobre todas esas cousas que nos importan e nos fan ser quen somos. Un episodio para poñerse un té ou un café, acender unha candeas e aprender a perdoar, coidar e querer á nosa versión adolescente.

Estas pringadas abren nova tempada moi emocionadas e sendo tan pringadas que volven aos seus inicios con interferencias de por medio. Malia todo, nada nos impide comezar por todo o alto coa única e inigualable (redobre de tambores) Belén Puime! 

Hai un ano Uxía Vázquez (falar sen saber, querémosvos) recomendábanos a esta talentosa muller nova que fai cousas e nós somos rapazas de palabra. Por iso, hoxe somos un pouco máis transparentes e iniciamos este novo ciclo falando do instituto e do acoso escolar, da época universitaria, de crear proxectos cos teus amigos, do fomo e de ser unhas mamarrachas. 

Cando o día de mañá demos as tres xuntas as badaladas, recordaredes que as pringadas aliadas poden chegar tan lonxe como se propoñan. Ao final do episodio de hoxe vén unha sorpresiña, cortesía de @noemiavg e @guille_lp_97 Escoitámonos na rede!

As Cristais de Meraki despedimos esta primeira tempada por todo o alto nun día para festexar. Aproveitamos este día de nadal para facervos este pequeno agasallo e así poder darvos un anaquiño de nós nestas datas tan felices para algúns e complicadas para outros. Foi un pracer enorme compartir todo isto con vós. Por iso, porque sen as persoas que nos escoitan non habería podcast, despedímonos cun Q & A para intentar darlle resposta a todas as vosas inquedanzas e curiosidades. Ademais, as Cristais desta tempada tamén fan a súa aparición especial. Como xa adiantabamos, o último capítulo é unha festa, por iso para gravalo fixemos unha pequena cea de nadal, sen discusións, chea de amor e con moitos cinnamon rolls. Vémonos pronto. Isto non e un adeus, é un ata logo ;)

Achégase o final da segunda tempada de Cristais de Meraki e como todas as festas, non nos queda outra que rematar con música e con mulleres que fan música. Hoxe vén a parolar con nós outra dupla galáctica. As Fillas de Cassandra chegan forte para falar de música en directo, da síndrome do impostor, do auxe da música en galego e da importancia de referentes na defensa da lingua, tamén dende a perspectiva neofalante. Un programa con sorpresiña ao final no que sentamos as bases do que será o último episodio da tempada. Estades preparadas para tocar o bis? Mentres tanto, escoitade música en galego, escoitade a Fillas de Cassandra e, xa de paso, escoitádenos a nós :) 

Unha domingo máis e unha semana máis que as vosas podcasteiras favoritas sacan novo episodio. Comeza a achegarse a recta final da tempada e semella que nos poñemos máis intensas e reivindicativas que nunca. Entre a fobofobia, a androfobia e a aeronausofobia acabamos facendo un repaso por todas esas pequenas (e grandes) cousas que dan susto e nos poñen a tremer. Que facemos cando temos medo? Como evolucionan os medos? Que traumas de cativas nos fan fuxir e saír por patas? Abrímonos en canle e superamos o medo de expoñer ao mundo que somos vulnerables. Como estades? Agardamos que non con medo, ou si, quen sabe. Igual temos que aprender a aceptar e abrazar as cousas que nos asustan. 

Benvidxs a un novo capítulo! Hoxe comezamos falando sobre o concepto de ser viejoven, analizamos as carácterísticas do que se podería considerar un fenómeno social, desglosamos a idea de "ser muy madura para tu edad" e, nalgún momento pola metade, perdémonos polo camiño e danos tempo a parolar sobre as "that girl", a infancia, a sexualidade e as visións conservadoras da vida. Queixámonos moito e algo tentamos descubrir. As Meraki volven outro día máis, mentres a idade llo permita.  

Estudando xornalismo hai días nos que parece que nada anda ben. Precariedade, inseguridades, trabas para falar das cousas que che interesan... Esa é a historia que sempre se conta, pero hai tamén outras historias, queda aí fóra un raio de esperanza. Para nós ese raio vive en Alejandra. Falamos con ela para que nos conte como se conseguen colaboracións con revistas, onde se busca a inspiración, a través de que formas se aprende a comunicar, ou mesmo como facer unha comunicación dende o rural. Todo isto mentres aínda intentas sacar a diante unha carreira que tanto che pode dar a vida como quitar a ilusión. Hoxe poñemos o foco na luz e na vida para aprender a facer un xornalismo da terra (e dende a terra).