Miar wenns wüsse.

Zum Abschluss vo üserem Podcast hen mier üs denkt ka, dases nid mier wüsse wenn sondern ihr. Mier hen eu über Instagram gfrogt, was ihr vo üs wüsse wend und hen üs es paar froge usgsuecht womer i dere Folg beantwortet hen. Danke a alli wo üsere Podcast immer glose hen. Es het üs mega Spass gmacht. Und etz na zum letzte mol, viel Spass bim zuelose wünscht eu Miar wenns wüsse!

In de 11. Folg gohts um Sugus, Ricola, Muffin, Karamel und Sprüngli. Was die Näme mit üserem Gast zum tue hen, das erfahren er wenner in üseri neu Folg drilosen:) Viel Spass bim zuelose!

Für üseri 10. Folg hen mer üs was speziells überleit und zwar hen mer i dr hüttige Folg kein Gast. Mier durlöchern üs gegesitig mit Froge, wo mr für die jewiels ander vorbereitet hen. Das sind Froge, wo mer üs gegesitig no nie gstellt hen und das muess was heisse, will mier üs scho sehr guet kennen und einiges überanand wüssen. Mier hends sehr lustig gfunde, zum die Folg ufzneh und hoffen, sie gfallt eu au so fest wie üs!

In üsere 9. Episode gohts um dr Patrick. Er isch 26 johr alt und verzellt üs vo sim Lebe als Landwirt, sinre Fasiznation für Tier und wo er i de Landwirtschaft no Verbesserigsmöglichkeite gseht. Über das und vieli witere spannendi Facts reden mier i dere Folg. Los doch mol ine. Mier würen üs freue!

Noch einere chli längere Pause simmer zruck mit üsere neue Folg. E Folg wos um es extrem wichtigs und spannends Thema goht und zwar die nonbinär Gschlechtsidentität. Lu verzellt üs meh übers Lebe als nonbinäri Person und was sich alles gändert het, sitdem Lu sich als nonbinär identifiziert. Mier sind mega froh het Lu sich dezue bereit erklärt zum mit üs über das Thema z'reda und hoffen ihr finden die Folg genauso spannend wie mier. Viel Spass bim zuelose!

Mir sind zruck noch üsere Summerpause und hen e spannendi Folg für eu! Dr Bruef diplomierti Pflegfachfrau isch sehr vielsitig und chan au extrem astrengend si. Hesch gwüsst, dass die meiste Pflegfachfraue nid imne 100%-Pensum schaffed? Über das und vieli anderi spannendi Facts redemr i dr hüttige Folg. Los doch inne, wenn meh drüber wüsse wetsch! Viel spass und danke fürs zuelose :-)

Unterem Begriff Timeout-Schuel hend viellicht ned alli e gnaui Vorstellig. D'Coralie verzellt üs hüt vo ihrem vielsitige Job als Sozialpädagogin. Mir finden zemme use, wie sich ihre Alltag döt gstaltet und was für Erfahrige sie bisher het sammle dörfe. Mier hen sehr viel Neus dörfe lerne und hoffen eu gohts gliech!

In de hütige Folg gohts um d’Simone und ihri unvergesslich Zit ufm Jakobsweg. Sie verzellt üs was es mit ihrem Wanderstock uf sich het und wieso das sie am Schluss niemals denkt hetti, dass sie in Träne würd usbreche. Viel Spass bim zuelose!

In üsere 4. Episode gohts um de Fabio und um sini Muettersproch Rätoromanisch. Häsch gwüsst, dasses mehreri Idiom im Romanische git? Über das und vieli witere spannendi Facts reden mier i dere Folg. Los doch ine, wenn meh über üseri 4. Landessproch wetsch wüsse. Viel Spass!

Hüt gohts um Journalismus, d'Sarah isch 33i und glernti Journalistin, sie verzellt üs wieso das Journalistin ihre Traumbruef isch. Wieso sie sich aber nach 13 Johr bim Radio doch noch für en andere Weg entschiede het, findet ihr use wenner driloset.

In üsere neue Folg gohts um d Olivia. Sie het 7 Mönet imne Kinderheim in Bolivie, Südamerika verbrocht und hets bis zum hüttige Tag nie bereut. Nach ihrer Matura isch sie uf und devo und wenn du möchtisch erfahre was sie i dere Ziet am meiste usegfordert het und was sie nie vergesse wird, denn los doch in üseri neui Folg ine.

Ab uf Hollywood? Nei. Schauspielerin in dr Schwiz, do drunter hen vieli ned sone Vorstellig. D'Flurina verzellt üs meh usem Lebe vonre Schauspielerin, wo ihri Liebi defür entfacht isch und was ihre am meiste Freud dra bereitet. Viel Spass bim zuelose!