Културен Подкаст

„Претставата „Јазли“ е вистинско освежување за театарската сцена, и во тематска и во етичка и во визуелно-сценска смисла. Изведбата на актерите е на врвно ниво, а гледањето на претставата се дожувува како фасцинантно естетско искуство. Длабочината на текстот „Јазли“ беше препознаена и на Македонскиот театарски фестивал во Прилеп, каде Рефет Абази ја доби наградата за најдобар драмски текст во 2022 година.“ - Тони Димков за претставата „Јазли“.

Слушнете ја целата рецензија и откријте повеќе за драмата, за процесот и за претставата и проверете кои се следните изведби на сцената на Албанскиот Театар во Скопје.

„Она што „Чудна случка со кучето во ноќта“ ја прави возбудлив материјал за работа е темата што ја отвора овој текст. Тоа е светот на Кристофер, светот на „посебниот“, „различниот“, „отфрлениот“, „исмеаниот“, „потценетиот“. Во време во кое многу општества, па така и нашето, се борат за инклузија на луѓето со посебни потреби, да се работи еден ваков актуелен материјал се чини исклучително важно. Во таа смисла, претставата има и едукативно-воспитна функција и може да ја одреди за една од своите целни групи и младата тинејџерска публика.“ - Тони Димков за претставата „Чудна случка со кучето во ноќта“ во режија на Зоја Бузалковска.

Слушнете ја целата рецензија и откријте повеќе за драмата, за процесот и за претставата и проверете кои се следните изведби на сцената на Драмскиот Театар во Скопје.

„Претставата вреди да се погледне, пред сѐ, заради надежта што ја дава дека има прогресивни поединци што сакаат да го повлечат општеството напред, иако заедницата им лепи етикети на „народни непријатели“. А, секогаш вреди да се има надеж за прогрес.“ -  Тони Димков за претставата „Народен Непријател“.

Слушнете ја целата рецензија и откријте повеќе за драмата, за претставата, за процесот, за режијата за актерската игра и слично. И проверете кои се следните изведби на сцената на Македонскиот Народен Театар .

Тони Димков е еден од ретките новинари, кој во текот на неговата триесетгодишна кариера константно и посветено зборува за светот на културата.

Преку неговите интервјуа, рецензии и критики објавени во различни медиуми, уметниците и културните дејци добиваат постојано признание и промоција на нивните дела и проекти, а публиката има можност да ги открива сите значајни новости од областа на културата и уметноста во Македонија.

Од своите студентски денови па се до сега, во неговата триесет годишна новинарска кариера има работено во многу различни форми на медиуми, како во емисијата „Добро утро Македонија“ на Македонската Телевизија, потоа за дневните весниците „Утрински“ и „Дневник“, неделниот весник „Граѓански“, магазинот „Глобус“, „Форум“, „Лајф Магазин“ и за порталот „МКД МК“. Во последните две години работи како уредник  на „Културен печат“, додаток за култура на „Слободен печат“.

Слушнете го нашиот разговор и откријте повеќе за тоа како изгледа работата на еден новинар во областа на културата, кои се најголемите предизвици, за новинарскиот жанр – интервју, за тоа зошто е значајно новинарите да пишуваат театарски рецензии и уште многу други интересни теми!

Краткометражниот филм „Синиот Час“ по сценарио и во режија на Ана Јакимска ја имаше својата премиера во Скопје на овогодинешниот филмски фестивал „Синедејс“ насловен „Од повисоко подобро се гледа“. Позади себе Ана Јакимска како режисерка има три краткометражни филмови меѓу кои е и филмот „Синиот Час“, а во моментов го развива сценариото за нејзиниот прв долгометражен филм.

Филмот е во копродукција на Кавал филм заедно со Круг Филм и Филм за нас, и со финансиска поддршка од Агенција за филм. Актерската екипа се состои од Наташа Петровиќ која ја игра главнатa женска улога, Жаклина Стевковска, Дарко Набаков и Тамара Ристоска. 

Слушнете го нашиот осврт кон филмот, следете го официјалниот фејсбук профил на филмот https://www.facebook.com/BlueHourTheMovie и обавезно погледнете го на следната проекција!

Екипата на новото независно театарско здружение  „Штрих“ ни покажа дека -Шансата не се чека, туку таа се создава!. Кога повеќето драмски текстови според денешната публика се сметаат за монотони,застарени и досадни, тие решија од нив да создадат нова актуелна форма. Кога повеќето актери и режисери чекаат сцената да им биде подарена тие се изборија за неа.  

Слушнете го нашиот разговор со дел од екипата, откријте повеќе за тоа кои се „Штрих“, за претставата „Only Artists Left Alive“, за процесот и подготовките, за мотивацијата и инспирацијата, за предизвиците и слично!

Голем број на актерски остварувања на независната сцена, авторски перформанси, основање на првата платформа за аудио книги на македонски јазик, стенд-ап настапи, настапи со Импров Група Настап... Ангела Стојановска секојдневно отркива и развива нови страни од актерската професија.

Во овој подкаст зборувавме повеќе за тоа како се создава авторски перформанс, за предизвикот успешно да се оствари споредна филмска улога која нема реплики, за првата платформа за аудио книги на македонски јазик „Само глас“, за тоа како се подготвува стенд-ап настап и за уште многу други интересни и забавни теми.

Слушнете го нашиот разговор, а потоа ако сакате паметно да го искористите вашето слободно време можете да проверите кога има следна изведба на перформансот „Срам“, да ја слушнете вашата омилена книга на платформата „Само глас“ или да си резервирате билети за Импров Група Настап!

Дебитантскиот долгометражен филм „Нема да си сама“ по сценарио и во режија на Горан Столевски со својата премиера на престижниот филмски фестивал „Санденс“, е еден од филмовите кој доживеа огромен успех во 2022 година.

Европската премиера на филмот се одржа на овогодинешниот филмски фестивал „Синедејс“ во Скопје.

Филмската приказна се одвива во 19ти век во село во Македонија, каде млада девојка по име Невена е киднапирана и преобразена во вештерка од страна на прастар дух.

Играат: Сара Климоска, Нооми Рапас, Анамарија Маринка, Карлото Кота, Алис Енглерт, Камка Тоциновски и други.

Филмот „Нема да си сама“, преку пишани рецензии од различни светски медиуми, досега се здоби со огромен број на пофалби и признанија.  зборуваат за истио со огромно одушевување, пофалби и признанија. Меѓу нив е и магазинот „Вараети“, кој го смести Горан Столевски во листата на десетте режисери кои несмееме да ги пропуштиме во 2022години.

Слушнете го нашиот разговор за „Нема да си сама“ и погледнете го филмот  доколку сеуште тоа не сте го направиле!

„Театарската критика треба да биде пријател на театарската претстава, ама од оние строги пријатели, оние отворени и искрени пријатели кои ги имаме.“ - Ана Стојаноска

Во овој подкаст ќе зборуваме со Проф. Д-р Ана Стојаноска, која е театролог, писателка и професорка на Факултетот за драмски уметности во Скопје. Слушнете го нашиот разговор и откријте повеќе за театрологијата, за театарската критика и колку е клучно нејзиното влијание за позитивен развој на театарот. 

Ана Стојаноска има учествувано на многу симпозиуми, научни трибини и работилници од областа на театрологијата, компаративната книжевност и културологијата. Исто така, е дел од авторскиот тим на Поимникот на книжевната теорија, член на Друштвото на писателите на Македонија и има работено како истражувач -координатор во Институтот за театрологија при ФДУ.

Авторка е на драмата „Трогледало“, монодрамата „Стаклен лампион“, збирката поезија „Трепетлика“, романите „Јас и Лин, отпосле“ и „Лебед“. Авторка е и коавторка на повеќе театарски монографии, приредувач на книгите: Драми од Дејан Дуковски и Современа македонска драма и на деведесет студии и есеи објавувани во македонската и странската периодика.

Слаѓана Вујошевиќ е актерка со успешна интернационална кариера. На некои им е позната по нејзините улоги изиграни на сцената на Турскиот театар во Скопје, на други по актерските остварувања во турските телевизиски серии, на некои по улогите на филмското платно, а на децата им е најдобро позната по серијата „Светот на Биби“.

Слушнете го нашиот разговор и откријте повеќе за нејзината погледи и ставови кон актерската професија, за работата во Истанбул и тука, за толкувањето на главната женска улогата во новиот долгометражен филм „Денот на жената“, во режија на Гоце Цветановски и за сите други проекти кои можеме да ги очекуваме во блиска иднина!

Слушнете ја осумнаесеттата епизода на „Културниот Подкаст на Сара и Мартин“.

Во оваа епизода разговараме со Дијана Томиќ-Радевска и Бојан Георгиевски - куратори на две битни изложби што беа поставени минатата година во резиденцијата на Европската унија во Скопје, со наслов Уметноста на досадата и Бегство.

Оваа година со почеток во март и во текот на следните неколку месеци, на истата локација на улица Ацо Караманов бр 22, ќе биде одржана нова изложба која ќе биде повторно курирана од Дијана и Бојан. Насловот на оваа изложба е Розеви Тигри, Златни Гуштери и Што Уште Не. Изложбата ќе биде отворена до до 20 Мај, оваа година и срдечно ви препорачуваме да ја посетите.

Дијана Томиќ-Радевска е сликар, графичар, концепциски уметник и куратор на уметноста со повеќе од 30 самостојни изложби кај нас и во странство. Бојан Георгиевски е сопственик и раководител на уметничката галерија Акантус која неколку години изложува воспоставени и нови уметници од македонија.

Слушнете го нашиот разговор и уживајте!

Слушај уметност, слушај култура, слушај „Културен Подкаст“!

„Еднаш ме прашаа што ми е поголем предизвик: театарот или поезијата. Секако, немам сомнежи дека театарот ми е секогаш број еден. Но, прашањето ме поттикна да размислам што е она што ги поврзува во мене овие два света. Кога помислувам на творечките процеси - создавање на една улога и пишување, мислам на искреноста до гола коска. “ – Христина Цветаноска

Во оваа епизода разговараме со актерката Христина Цветаноска, која покрај покрај завршувањето на студии по актерска игра на Факултетот за драмски уметности пишува поезија и воедно е и дипломиран професор по италијански јазик и магистриран театролог.

Разговорот опфаќа голем број на теми поврзани со пишувањето поезија,  театарот и театарската критика, актерот и значајноста на работилниците при неговото надоградување, што е квалитетна театарска критика и уште многу други теми вредни за слушање.

Концептот на оваа епизода е комбинација од интервју и рецитирање поезија, односно нашиот разговор е проследен со изведба на неколку поезии напишани и изведени од Христина Цветаноска.

Слушнете ја епизодата и уживајте!

Слушај уметност, слушај култура, слушај Културен Подкаст

... во аголот

пајак - бродоломник
крои планови
за нов дом

нашиот е
куќичка за птици - преселници

ние сме
бротче од хартија среде потоп
кое копнее

по копно

Стиховиве се дел од збирката „Куќичка за птици преселници“, една од неколкуте каде што може да се вкуси креативниот нектар на Здравески, чие творештво е обезбременето од императивот на „тешка“ поетичност со цел да се пишува поезија.

Во разговорот со Ѓ. Здравески ќе дојдеме и таа попатна станица - неговиот, така да се каже, метод на пишување поезија, кој се заснова на нужна бестелесност. После голем број изданија на настанот „Астални Проекции“, Здравески и неговиот соработници во поезијата ќе го организираат првиот поетски фестивал во Скопје, за што ќе слушнеме во епизодата.

Ќе ги слушнеме и неговите размислувања за, условно кажано, силата на промена што се содржи во луѓето што креираат поезија и разните видови на уметност, и како тие се неминовно сопоставени кон прашањето на политичките системи што ни ги креираат впечатоците од реалноста.

Секако, има уште многу симболи и содржини што се содржат во разговор кој се слуша како прошетка по планинска патека.

Слушај уметност, слушај култура, слушај Културен Подкаст!

Во оваа епизода разговараме со режисерката Теа Беговска за првото издание на онлајн интернационалниот фестивал „Sturm und Drang“, за театарот, за институционалната и за независната сцена, за односот режисер актер, за довербата која е неопходна во еден креативен процес и за уште многу други интересни теми вредни за слушање.

Теа Беговска  во 2013та година дипломира на  Факултетот за театарски уметности - ЕСРА во Скопје. Од почетокот на студиите па се до денес комплетно се посветува на работење интересни и иновативни проекти, како на институционалната така и на независната сцена.

Најновиот проект на Теа Беговска, оваа година, е првиото издание на онлајн интернационалниот алтернативен фестивал „Sturm und Drang“ за кој и самата кажува дека е најголемиот предизвик кој си го задала досега.

Фестивалот претставува интернационална платформа за промоција и соработка помеѓу уметниците ширум Европа. Оваа година на фестивалот учествуваа вкупно 11 различни продукции од: Словенија, Србија, Црна Гора, Бугарија, Романија, Словачка, Англија, Гранција, Италија и од Австрија.

Во главен фокус на овогодинешното издание на „Sturm und drang“ беа интернационалната и студентската програма.

Во интернационалната програма учествуваа независни театарски групи кои работат алтернативен театар, освен една институционална продукција на Словенско Младинско која учествува со претстава на Драган Живадинов.

Додека пак студентската програма се состоеше од повеќе работилници, мастеркласови, универзитетска конференција и неколку студентски претстави.

Слушнете го нашиот разговор и уживајте!

Слушај уметност, слушај култура, слушај Културен Подкаст!

„И дојде ден кога човекот сфати дека животот одамна не е како на филм.

Тој ден човек беше принуден да се соочи со реалноста, да ја прегрне лагата за неговиот живот и да продолжи напред.“

Овој подкаст нé враќа назад во времето, на 23.07.2021 и 24.07.2021 во МКЦ каде можевме да ја погледнеме премиерата и претпремиерата на претставата „Шапка, Чоколадо, Анус и уште нешто“.  Претставата „Шапка, Чоколадо, Анус и уште нешто“ во режија на Ана Батева, во продукција на „Театар Златен Елец“ и „СПАМ студио“ е создадена по мотиви на драмата „Старицата од Калкута“ од Ханох Левин. Во претставата играат актерите: Григор Јовановски, Надица Петрова, Димитрина Мицкоска, Бобан Алексоски, Миа Кантарџиева – Петровска и Давид Илиќ.

Авторот на драмата, Ханон Левин со овој текст презентира безмислостна дисекција на основните вредности на нацијата и државата. Станува збор за црна комедија која преку различни скечови и апсурдни ситуации раскажува за парадоксот на денешното постоење. Ликовите исправени на работ на екзистенција, свесно ги исмејуваат животните неправди и системскиот апсурд, и со достоинство се противставуваат на болката причинета од соочувањето со светот.

Во овој подкаст накратко зборувавме со актерката Надица Петрова, која игра во претставата и е еден од основачите на независниот театар „Театар Златен Елец“ . Исто така, решивме да побараме и усно мислење од публиката.

Слушнете го нашиот разговор и уживајте!

Слушај уметност, слушај култура, слушај Културен Подкаст!

Бруталистичкиот објект на Поштата во центарот на Скопје беше претворен во „платно“ за еден од визуелните уметници кои ја проектираа нивната уметност за време на Скопје Лајт Арт Дистрикт. Овој уникатен настан привлекува се поголемо внимание кај жителите на Скопје и му помага на градот да се етаблира на европската мапа на културно-уметнички збиднувања. Во следниот подкаст ќе разговараме со Филип Аврамчев, човекот што го организира Скопје Лајт Арт Дистрикт.

Слушнете го нашиот разговор и уживајте! 

Слушни уметност, слушни култура!

Соништата постојат со цел да бидат реализирани. 

Пример за оваа мисла е македонската продукциска куќа ,,Дрим Фактори’’, која од 2007та година па се досега реализира огромен број на филмски проекти, од сон во реалност. 

Во оваа епизода зборуваме со продуцентот Огнен Антов, кој е основач на продукциска куќа „Дрим Фактори“, која продуцира играни филмови, ТВ проекти и документарци. 

Копродукцијата на филмот „Вера сонува за морето“ е најновиот успех кој го доживеа Огнен Антов заедно со  „Дрим Фактори“. „Вера сонува за морето“  е долгометражен филм во режија на Калтрина Красниќи кој на престижниот филмски фестивал во Венеција (фестивал од А-категорија) ја освои наградата „Автори под 40“ за најдобра режија. 

Огнен Антов досега како продуцент и копродуцент има работено на повеќе од дваесет и седум филмски проекти, меѓу кои се и: „Стела“ во режија на Столе Вујичич, „Џган“ во режија на Вардан Тозија, „Дедо и Внук“ во режија на Илија Пиперкоски, „Ловци на вештерки“ во режија на Рашко Миљкович, „Споменикот на Мајкл Џексон“ во режија на Дарко Лунгулов, „Висини“ во режија на Виктор Божинов итн. Сите наведени и ненаведени филмски проекти во продукција на Дрим Фактори досега имаат учествувано на огромен број интернационални филмски фестивали и на истите имаат освоено огромен број на награди. 

Покрај постојаната продукција на филмските проекти, во 2013та година Дрим Фактори на Македонската радио телевизија успева да го донесе популарното шоу ,,Танц со ѕвездите’’, по пат на превземање на лиценца од страна на Би-Би-Си. Со овој потег, Дрим Фактори инвестира во тоа да се подобри продукцијата на македонските телевизиски канали, да се разбие секојдневната монотона програма составена од турски серии и политика. 

Покрај сите успешни филмски и ТВ проекти, Дрим Фактори низ годините дава одличен пример за тоа како се работи и создава маркетинг за еден филм, на креативен и неконвенционален начин. Дали можеби ја паметите мини-кампањата за долгометражниот филм ,,Џган’’? Или пак,  лажните вести за споменикот на Мајкл Џексон во Градскиот Трговски Центар? Маркетинг на филм е само една од значајните теми за кои зборуваме во оваа епизода. 

Слушнете го нашиот разговор и уживајте!

Талент кампусот на Сараевскиот филмски фестивал е платформа за идните филмски професионалци од Југоисточна Европа и Јужен Кавказ, во која секоја година се одбираат 55-65 кандидати за интензивна петдневна програма, која се состои од повеќе различни работилници за режисери, актери, сценаристи, новинари и критичари, како и обука со некои од водечките светски филмски професионалци.

Во програмата на „Таленти Сараево 2021“ оваа година учествуваа шест кандидати од Македонија. Актерките Сабина Мемиши, Тамара Ристоска, Сара Анастасовска (која беше одбрана претходната година, но фестивалот се одржа онлајн) во сегментот „Acting studio“, Филип Мишов и Кристијан Фидановски беа дел од работилницата „Talent press“, додека режисерката Сандра Ѓоргиева со нејзиниот краток филм „Еден тон сладолед“ учествуваше во секторот „Pack & pitch“. каде освои награда за најдобар пич (претставување) и парична награда за постпродукција на звук.

Во оваа епизода учествуваат сите кои беа дел од Таленти Сараево 2021 (освен актерката Сабина Мемиши, која што не беше во можност да присуствува). Целта на нашиот разговор е да го раскажеме убавото искуство и да пренесеме информации за тоа кои се бенефитите од талент кампусот, што е потребно за да се аплицира и слично.

Слушнете го нашиот разговор и уживајте!

Димче Коцо (1910 - 1993) - член на МАНУ, археолог, историчар на уметност и уметник, е еден од највпечатливите македонски уметници од старата генерација, чие име е практично многу малку познато кај општата популација. Оваа епизода е посветена на неговото творештво и е изработена по повод јубилејот што се одржа во Националната галерија Чифте Амам.

На подкастот ќе го слушнете личното толкување на неколку дела од страна на Мартин, детаљи од изложбата, извадоци од стара репортажа на Македонска Радио Телевизија, како и разговор со Маја Чанкуловска Михајловска, виш кустос на Националната Галерија.

Слушнете ја епизодата за творештвото на Димче Коцо и уживајте!

Во оваа епизода зборуваме со младиот филмски режисер, Батухан Ибрахим. Батухан Ибрахим во 2020тата година дипломира на Факултетот за Драмски уметности во Скопје. Досега има работено на многу филмски проекти, како режисер, скриптер и како асистент на режија.

Неговиот краток филм „Twisted“ беше примен на повеќе интернационални филмски фестивали на кои досега има освоено награда за најдобра режија, најдобар краток филм и најдобро актерско остварување. Главната улога во филмот ја игра актерката Мими Трпковска.

Во оваа епизода разговараме со театарскиот режисер Синиша Ефтимов и актерите Фаик Мефаилоски и Исидор Јованоски.

Оваа епизода е снимена  само неколку дена по премиерата на претставата „Четири соби“ во Велешкиот театар „Јордан Х.К Џинот“. Претставата „Четири соби“ е адаптација на истоименото филмско сценарио „Четири соби“, омнибус во режија на Квентин Тарантино, Роберто Родригез, Александар Роквел и Алисон Андерс.

Режија: Синиша Ефтимов

Актери: Фаик Мефаилоски, Исидор Јованоски, Самоил Стојановски, Маја Љутков, Кети Борисовска, Талија Настова, Зорица П. Панчиќ, Симона Димковска, Жарко Спасовски и Благојчо Стојанов.

Сценографија/ Ксотимографија: Александар Ношпал

Композитор: Сашко Костов