Gschmois vo ois

Hüt brennt ois vieles under de Negel! D Jana hät sich nach Jahre wieder mal in Datingdschungel gwagt, und verzellt vo ihrne traumatisierende Erläbnis.

D Salome rantet über unfähigs Verchaufspersonal und ihri gschitereti Worklife balance ide letzte paar Wuche.

Zudem bespräched mir oisi Ferieplän und d Salome probiert de Jana ihri Vacay Anxiety z näh.

Wennd wüsse wetsch, was d Jana für noie Sport usprobiert hät, wiemer NÖD sött en Staubsuger an Mah/ad Frau bringe und was grad susch so i oisem Läbe abgaht, denn tuuuuune in!

List de Text eigentlich irgendöpper?

Gheimi Bonusfolg, wo nie veröffentlicht worde isch...

Lieber z‘spat als nie - das hend mir ois au dänkt und sind drum sit langem endlich mal wieder ad Seck!

Di ersti Folg vom Jahr ischs Äquivalent zu ois, bizli träg, light-headed und natürlich voller Problem.

Es gaht um löchrigi Wösch, interessanti Ihrichtigsgegeständ, Neujahresvorsätz und es generells Life-Update vo ois. Enjoy und froied oi ab jetzt uf e frischi Folg jede Monet (hoffentlich)!

Hüt sind mir voller Vorfreud: über de Jana ihri geniali neui Wohnig und de Salome ihri bevorstehende Ferie! Mir redet über de WK am Arsch der Welt und d'Bachelorarbet, wo sich au nöd voneleige schriebt. Es gaht um Trash, Hustle, gueti Musig, Abschied und en kurrlige Foxtrail in Bern. Ih dem Sinn: allne en guete Schlussspurt, en schöne Summer und bis zude nächste Folg, tune in!

Hüt sind d Salome und d Jana ungwohnt guet druf underwägs. So guet, das mir glatt d Zyt vergässe händ und mer über die aggressive Verkaufsstrategie vom Vero Moda nur no lache chönd. Redelustig verzellt d Salome vode letzte Errungeschaft im Studium und d Jana über ihres noie, alte Hobby. Generell mutiered mir langsam aber sicher, wie mir mit Schrecke i dere Folg münd feststelle, immer meh zu Ömis. Es wird über Usgang und Puzzles diskutiert, Kaffi- und Werbekonzept pitcht und natürlich au wieder über absolute Nonsense gredet. E noi Folg zum ihschalte, abschalte und vergässe!

Mer chönnt meine, d Salome isch gar nöd am studiere, sondern jettet um di ganz Wält. Während d Jana im monotone Alltag steckt, isch d Salo scho wieder ide Ferie gsi - Dasmal in Rom, und es wird über schlächti Pizza, Falschparkendi und Touristefalle brichtet. D Jana verratet ihri Tipps für di perfekt Wohnig und uf was mer bide Wohnigssuechi unbedingt luege muess.

Wennd wetsch wüsse, wies bi de Salo aktuell im Studium und im Paralleluniversum vode Jana lauft, denn los ine und lahn dich vonere witere Stund Nonsense berisle!

[Song 1: Panikweiss - Majan ft Schmyt

Song 2: Gimme Love - Russ]

Ide hütige Folg wird keis Thema usglah, denn euisi Nerve ligged blank. Mir löhnd Dampf ab und es wird niemert verschohnt, will es gaht um nervigi Husverwaltige, unfähigi Fraueärzt, überraschendi Vorkommnis ade Uni und no vieles meh! Wenn au du wüsse möchtsch, wie d'Salome is neue Semester gstartet isch oder was d'Jana am Fasnachtsmäntig erwartet, los ine und lahn dich überrasche vo neuem Premium-Content. 

Räge Räge tröpfli, es prasslet uf oisi Chöpfli - Dä Herbst staht vor de Tür und mir schwelged nomal in Erinnerig vode letzte paar guete Spatsummertäg. Under anderem wird de Jana ihre Filmriss vo ihrem Geburi ufgarbeitet und über de Hustle vo de Salome i ihrem Praktikum verzellt. Aber au suscht liefemer oi dere Folg wieder mal es all Inclusive Ahgebot mit Tipps für neui Musig, Events to be, Must Seen Film im Herbst und vielem meh. Losed ine und gnüssed e Stund lang ihkuschlet Dehei inere warme Decki und me Teeli s Hundewätter dusse. S wird besser - we promise!

Leute, mir hend oi gaaanz vill z'verzelle, hüt gahts richtig ab!!! Mir sind ufeme absolute Höch und brichtet oi vo neue Jobs, Konzertplän, Buechempfehlige, brandneue Songs und no vielem meh. Es gaht um Büsis, Ski fahre, Kommunikationskonzept und alti OASG-Stories. Im Gegesatz zum Wetter strahled mir, als ob Hochsummer wär. Tauched ih und lönd oi vo oisere guete Luune ahstecke, es chunnt alles guet und s'Lebe gaht wieder los!  

Hurra, mir hend en witere Meilestei erreicht! D'Zahl 25 staht zwar für Gliichgwicht im Lebe, mir sind aber grad alles andere als im Glichgwicht. Ih oisere 25. Folg gahts nämlich um alles und nüt! D'Misses Worldwide verzellt vo ihrem Trip uf New York City, währenddem d'Jana vo mysteriösem Chopfweh plaget isch (vo wo chunnt das ächt?). Es folgt e dramatischi Story über arbetslosi Semesterferie und e churzi Anekdote über e legendäri Reunion vo vier gackerige Hüehner. D'Jana packt us und brichtet vome unglaubliche Erlebnis, womer hend dörfe während oisem Sprachufenthalt in Bournemouth erlebe. Nur so vill: es sind rohi Eier und sozial schwachgstellti Mensche ime dunkle Park involviert. Tune in und hebed oi Sorg!

Hüt dreht sich alles ums Thema - äh, wüssemer eigentlich sälber nöd so genau. Äs bizli Neujahresvorsätz bespreche und 5-Sterne-Netflix-Bewertige sind aber sicher es Thema. Wieso dass d Jana kei ÖV meh fahrt und wenn dass d Salome ahfangt, ihri Semesterferie z gnüsse, das erfahrsch i dere Folg. Tune in und lahn dini Ohre wiedermal vo ois verwöhne. 

Mir garantiered oi minimum es Schmunzle bim lose, also di perfekt Lösig zum dini seasonal depression wenigstens für e Stund z verdränge. Gschmois vo ois goes international, mir verzelled vo oisem Trip nach Amsterdam und kurrlige Erläbnis, wo mer nöd wännd misse. Au bi ois wiehnachtets und passend zum Abschluss vomne witere, gar nöd mal so geile Jahr, lömer d Songs, wo ois durs Jahr begelitet hend, revue passiere und diskutieret eimal meh über Spotify-Wrapped. Losed ine und händ Teil anere Folg mit vielne Lachahfäll, oder wie früehner di coole gschribe händ: #lol #rofl

Für die hütigi Folg händ mir ois is Radiostudio kämpft und das nur für oi! Mir sind beidi müed und es isch, als hetemer oise Glüehwii scho trunke, obwohl mer de für später ahdenkt hend. Mir redet über de Jana ihri neui Wohnig und wieso sie ihres Läbe grad richtig gnüsst. D’Salome verzellt vo tolle Gruppearbete und Wohnstudie mit bahnbrechende Ergbnis. Mir schweifed wieder herrlich ab ih wundervolli deep talks und bespreched, was ois grad umetribt. Es gaht um ABBA, en Gheimtipp für di perfekti Bewerbig und Brustkrebs. Tune in! 

Leute! Mir hend oi wieder vill z'verzelle, will es isch einiges passiert. Mir händ Rolle tüüschlet: d'Jana het wieder en Job, währenddem d'Salome im letschde Monet ihri Festahstellig niedergleit hät und zur Vollbluet-Studentin worde isch. Warum Tutti.ch en Award gwünne sött und wieso das 23 jährigi Fraue in Usgang ab 16ni gönd, erfahreder ide neue Folg "Gschmois vo ois". Aber nöd nur bi ois het sich vill tah, denn s'Studierende Radio "Campus.fm" vode ZHAW heisst jetzt neu "ZAKK". Meh dezue verzelled mir ide neue Folg. Tune in! 

Klappe die Erste! Di ersti Folg vo oisem Laberpodcast isch da, und er wird sim Motto meh als Grächt. Hüt verzellt d'Jana über ihres komische Wucheend in Stuttgart sowie über Lifehacks für broki Lüüt und d'Salo thematisiert die Leiden des ewigen Krankseins und Assi-TV-Sendige im Namittagsfernseh. Tune In!