من 20 سنة، طبيب شاب قرر يسافر انجلترا علشان يطور نفسه ويبني مستقبله..

الطبيب الشاب ده - اللي هو العبد لله - فوجىء انه لازم يسجل نفسه هو وأسرته مع طبيب الأسرة أو الممارس العام في الحي اللي هو ساكن فيه....

ليه يا جماعة؟

قالوا لي: هو النظام كده..أي حد عنده إقامة في بريطانيا 6 شهور فأكثر..لازم يسجل عند طبيب الأسرة...

عرفت بعد كده انه في بريطانيا كل منطقة سكنية فيها مركز صحي، وكل المقيمين في الحي مسجلين فيه..

ماينفعش تروح لأى اخصائي إلا بتحويل من طبيب الأسرة....

الرعاية الصحية مجانية في بريطانيا..ماحدش بيروح عيادات ومستشفيات خاصة إلا يمكن الفنانين المشهورين ولعيبة الكورة الكبار...

الدولة بتدي طبيب الأسرة ميزانية محددة كل سنة، وهو بيصرفها على سكان الحي.

كل شوية ألاقي جواب أو اتصال من طبيب الأسرة:

- ده ميعاد الفحص الدوري بتاعك..

- تعال نعمل لك تحاليل..

- الأولاد تطعيماتهم الشهر الجاي..ماتنساش تجيبهم..

- أنا كتبت لك الدوا بتاعك..تعال لو سمحت استلمه...

الروشتات كلها بيكتبها طبيب الأسرة..وكل ده مجاناً..بتدفع فقط في الروشتة 7 جنيه استرليني...لو الروشتة فيها دوا ب10 جنيه، بتدفع فيها 7 جنيه..ولو الروشتة فيها دوا بألف جنيه..برضه بتدفع ال7 جنيه هم هم..

(متوسط الدخل الشهري للمواطن هناك بعد خصم الضرائب 2800 جنيه استرليني والحد الأدنى 1700)...

_____________________________

طبيب الأسرة في بريطانيا..عنده دايات زي اللي كانوا موجودين في مصر زمان..بيروحوا البيوت يولدوا الستات اللي ولادتهم مافيهاش خطورة...

عنده زائرة صحية..بتزور الناس في البيوت تطمئن عليهم وبتروح للستات بعد الولادة تعلمهم الرضاعة الطبيعية وازاي يعتنوا بالمولود...

عنده فريق رعاية منزلية..يزوروا كبار السن والناس اللي عندهم احتياجات خاصة ويراعوهم...

المبهر بالنسبة لي كان ان طبيب الأسرة يقدر يجيب مهندسين وعمال يعملوا اسانسيرات وحمامات مجهزة في البيوت للناس اللي عندهم إعاقة علشان يعرفوا يطلعوا وينزلوا ويتحركوا........................

كل ده على حساب الدولة...………………….

الحكومة كانت عاملة هدف ان عربية الاسعاف توصل لأي شخص في خلال ٧ دقايق.. ان شاالله يبقى في غابة ولا جبل..عاملين نقط اسعاف ونظام اتصالات ورابطينها ومظبطينها..

____________________________________

الدكتور أيمن طلعت وهبه استشاري في طب الأسرة...حصل على أعلى الدرجات العلمية والتدريب في طب الأسرة..من نظام مماثل في أستراليا..

رجع مصر من حوالي 18 سنة..وسعى بجدية ومثابرة انه يطبق النظام ده في مصر..

ايه اللي حصل لمساعيه؟ومصر مكانها فين من كل ده دلوقتى..؟وايه هو حال الرعاية الصحية ومستقبلها في مصر؟وايه هو حجم الإنفاق على الرعاية الصحية في مصر والعالم...؟

___________________________________ ايه هي الفحوصات الدورية اللي محتاج تعملها لأولادك؟

ايه هي الفحوصات الدورية اللي محتاجة تعمليها لوالدتك أو والدك أو جدك وجدتك؟

ايه هي الفحوصات الدورية اللي محتاجين تعملوها لنفسكم؟

ايه هي الأعراض اللي ممكن نعالجها بنفسنا أو بواسطة الصيدلي ..وايه هي الأعراض اللي لازم نروح ساعتها للدكتور ؟

امتى نروح العيادة وامتى نطلع على طول على الطواريء ؟

ايه هي أحدث العلاجات اللي وصلت مصر مؤخرا أو متوقع توصل في الشهور القادمة ؟

لو عندي صداع أروح لأي تخصص؟!!

___________________

ليه الطبيب بيطفش؟ وليه المريض بيتبهدل؟

الدكتور أيمن طلعت وهبه استشاري في طب الأسرة يجيب على كل هذه الأسئلة..

حرب السلايف وصراع الأحذية

كرسي في أول صفBy Yasser NegmAug 30, 2022